:: صباح الخير يابطل ::

بقلم الشاعر//معوض حلمي 

بمناسبة ذكرى إنتصار العاشر من رمضان ،
كل عام والجيش المصري والعسكرية المصرية بخير وأمان
~~~~~~~~~~~~~~~~~~~~~~~
:: صباح الخير يابطل ::
~~~~~~~~~~~~~~~~~~~~~~~
صباح الخير
لقلبك الطيب
وطبعك الأصيل ..

صباح الخير
يابو ضحكة يملاها الأمل
وتفتح دروب المستحيل ..
صباح الخير
ياللي ف عيونك
مداين عشق
وأنهار سلسبيل ..
صباح الخير
ياللي خليت رمالنا
أغلى من الدهب
ومن الياقوت ..
صباح الخير
ياللي صحيت فينا الكرامة
وبددت السكوت ..
صباح الخير
ياللي قلت
إللي هيعادي بلادي يموت ..
صباح الخير
ياللي ماشي
وسط المدافع
والبنادق والبارود ..
صباح الخير
ياللي شايل
روحك على كفك
وبتحمي الحدود ..
صباح الخير
ياللي صوتك زئير
بيحمي الحمى ويزود ..
صباح الخير
ياللي حلمك
مرسوم على كف القدر ..
صباح الخير
ياللي حبك
على باب قلبي اتحفر ..
صباح الخير
ياللي ضيك
أحلى من ضي القمر ..
~~~~~~~~~~~~~~~~~~~~~~~
بقلمي ..
معوض حلمي
منشأة بطاش
تمي الأمديد
دقهلية