متقلش أى رقم ونخلص
منير خاطر/يكتب...........
متقلش أى رقم ونخلص
إستنا لما الغاره تخلص
لما نشوف اللى ماتوا كام
لسا ناس تحت الركام
متقولش أتوقع وافضل
لما نحسب كام هيفضل
متفكرش الحسبه سهل
شوف كام واحد من غير أهل
وعدد اليتامى والأرامل
إجمع الأعداد بالكامل
شوف كام واحد راح فطيس
كام عروسه وكام عريس
وخللى دفتر كدا على جنب
لأطفال ماتوا من غير ذنب
كام شارع باقى وحاره
كام مدينه وكام مناره
إن كنت عالم وللا دارس
عد اللى فاضل م المدارس
كام مستشفى بقت رماد
كام عدد أيام الحداد
قيد واكتب فى الدفاتر
ورينى كدا لو كنت شاطر
لو عرفت كام الخساره
وكام اللى ماتوا فكل غاره
والمكسب والحصيله كام
قول على العرب السلام
منير خاطر
ليست هناك تعليقات