على فين يا مصر

محمد فتحي/يكتب ..........

( على فين يا مصر )

على فين يا مصر رايحة 

ولا مش عارفة المكان 

اوعى السكة السايحة 

مفيهاش بر أمان

أمتى تعرفى الطريق 

علشان تقدرى تعدى 

سكتك بحرها غريق 

مليانة عند و تحدى

ازاى مش عارفة عنوانك

ولا خلاص تاه منك 

معقول نسيتى مكانك

ازاى على كبر سنك

باين كده طريقك مسدود 

مليان حواجز و حجارة 

اكسرى بإيدك القيود

متقوليش أبدا يا جارة

فعلا الله فى عونك 

على اللى انتى فيه 

أقرب ما ليكى بيخونك 

مستنية تانى أيه

مش بتمنى ليكى الشر

انا صعبان عليا الحال

أمتى ترسى على بر 

ولا انكتب عليكى الترحال

اهين من التوهة يا بلدى 

هتسحب وراها 1000 جيل 

امشى فى السكة الوردى 

ده سهل مش مستحيل

أرسى بقى و أهدى شوية 

خليكى مصر بتاعت زمان 

فكرى فى ايامك الجاية 

كفاية بقى كده هوان

هاتى إيدك فى ايدينا 

صدقينى هنعلى لفوق 

لو ضيعنا من بعضينا 

مش هنلاقى للنجاة طوق

فى آخر سطورى بدعيلك 

بطلب من رب العباد 

يرحمك من عذاب ويلك 

يا مصر يا ام البلاد

كلمات : محمد فتحى