جنون الحب

  طارق السيد / يكتب..............

جنون الحب
عمري ماكنت في يوم أتصور
إني أحب أنا بدر منور
لو شوفتوها ياناس تسحركو
وهتقولوا واااو سبحان من صور
سحر الشرق في نن عيونها
الله يبارك فيها ويصونها
إللي يشوفها ياناس لو مرة
ف غمضة عين يصبح مفتونها
ولا خدودها ياعيني عليهم
التفاح يدبل جنبيهم
لما بتضحك أو تتيسم
غمازتين يترقّصوا فيهم
وعليها تقسيمة عود ياخراشي
لو مال كدا ميلتين ع الماشي
زي ماجرى فيا انا قبليكو
هيجرى فيكو اللي ما يجراشي
ياما قلت لنفسي إن أنا مش قدك
ولا قد الورد اللي ف خدك
ولا قد السحر اللي ف عينك
وأضعف قوي من ميلة قدك
لكن غصب عني بحبك
مدمن أدمن خمرة حبك
تاهت بيا ياروحي خطاويا
وماليش درب أمشيه غير دربك
قولوا محروم غلبه الحرمان
أومسحور في حالة هذيان
أو مندوه ندهته نداهة
بيعيش حلم جايب له جنان
قولوا ومهما تقولوا عليا
كلامكم مش هيأثر فيا
إذا كان حلم هعيش الحلم
وتفسره أيامي الجاية
بقلم طارق السيد