سلام يا صحبي
أحمد صبري/يكتب..................
سلام يا صحبي
إشرب يا صحبي الكاس
وإدفع تمن كلمتك
مالك ومال الناس
صوت الطاغوت موتك
قالوا عليك ابن موت
او مسجون لو نسيت
طلعت صوت مكبوت
بره المشهد مشيت
-
سلام يا صحبي سلام
وإحمد ربك كمان
دي الجايزة والوسام
ومين عليك زعلان
سيبك م الحمالات
اكتب حبة حواديت
في زمان الرقاصات
زي الجنينة إنتهيت
-
لو حد فيه النفس
كده هيخاف يتسمع
هتاخد ايه م الفلس
مالوش مكان الجدع
سلام ياعم الشنب
رجعت زي ماجيت
والكلمة كانت سبب
بنزين وعود كبريت
-
سلام بطول العلم
كده يبقى كله تمام
شرف الظهور للخدم
مفيش هنا إعلام
مكتوب على المحترم
يلبس هدوم البيت
واللي ضميره إتخرم
يقول من السكريت
احمد صبري
-
ليست هناك تعليقات