عينيكي

الشاعر صبري علي /يكتب

#عينيكي.

(1)

عينيكي مقام, وانا الدّرويش..

عينيكي سلام,ف ضلّه أعيش.

عينيكي كلام قريته كتير..

ولا فهمتوش.

قراني كتير, ولا فهمنيش.!

(2)

عينيكي سؤال ما لهش جواب..

ولا له زيّ.

وتحت الرّمش نقطة ضيّ.!

تفوت ع القلب , يهتف: "حي".!

ويرفرف ..

بسّ من غير ريش.!

(3)

عينيكي بخور..

دخان مع نور.

وانا, وحرفي يوماتي نزور..

قصيدة شعر' وسط نذور.!

 القلب شاهد ' كلّ المشاهد.

ولا عمره يشهد ف عينيكي زور.!

 السّهم نافذ 'وسط النّوافذ.

والضيّ نافذ..

من خلف شيش.!

(4)

عينيكي منام ' حلمته كتير..

ما فسّرتوش..

عينيكي كتاب, حروفه عتاب..

 ما نيش كدّاب 'دانا العاشق..

فمتلومينيش.

(5)

عينيكي أمان, وانا إنسان..

باقول الشّعر من غير صوت.!

واخاف الموت..

واحسّس ع الألم' بشويش.!!

صبري على

فبراير 2017