مارثون ذنوب
الشاعر عدنان فارس //يكتب
ماراثون ذنوب
ساكت يا صوت الحق
مبقتش اسمعك
غير بس في معاد الاذان
ويا بندقية خرستي ليه
ويا سيفي فينك من زمان
الحقد عشش في القلوب
وفي كل حته الظلم ساد
بنفوق على ماراثون ذنوب
وننام في مستنقع فساد
بينيمونا بالحبوب
ويطعمونا السحر زاد
تماثيل بنتحرك يا دوب
عسكر في شطرنج الشيطان
والسيرك منصوب كل يوم
والمسرحية هي هي
تعابين تغير في الهدوم
معازيم في حفلة تنكرية
وعصابه هربت من سدوم
عايشين في دور اصحاب قضية
واحنا في زنزانة الهموم
نكتب همومنا على. الحيطان
يا فجر ديكك صوته فين
مكتوم في جوفه معدش طالع
مش باقي منه غير انين
غطا عليه صوت الضفادع
ومفيش اسد يحمي العرين
ويا مين يا شبل عليك يدافع
والغابه دي يحكمها مين
تمساح بقرن وديل حصان !!؟
بقلمي/ عدنان فارس
ليست هناك تعليقات