انا والغربه
الشاعر ابراهيم بدر/يكتب
#أنا_والغربة
يهاجر حلمي في بواخر
وبلقى الحلم كان ساخر
بيسخر م الهوى والشوق
ويهجر قلب كان محروق
وقلبي لما يجي يفوق
يقوم الحلم يتاخر
وبسمع صوت يكون مخنوق
يقول يا بني بلاش تهجر
بلاش في الغربة تتكسر
في بعدك عني راح تخسر
دا هجرك ليا بيحسر
والاقي الحلم كان واعر
بعد نجوم ما... تتعدش
بكون مسكين ومتهمش
وانادي لفرحي م يردش
شبابي ف غربتي مكرمش
يموت الصبر من صبري
وبلقاني جبل صابر
يعدي الفجر على ليلي
وانا ليلي م يعرفهوش
وبندب في الظلام ويلي
نجوم الليل م بيحنوش
وبدري في السما حاير
غريب والغربة عمياني
واعيد الصبر من تاني
أنا صبري اللي رباني
وليل مربوط بضفاير
ساعات الفرح بيعافر
فيغلب يوم ألم كافر
ويتغلب على الأحزان
على الأشواق يكون صابر
ساعات الهم بيعاتب
فوق الأنفاس يكون راكب
ويسمعني وبيشاغب
ومن مأمور يعود آمر
ساعات البسمة تضحكلي
وترسم شوق على شكلي
فتعمل فرح كان ساحر
أنا برسم طريق مجهول
وحبل الهم ليه مفتول
ومشكلتي ماليها حلول
وماضي يعاند الحاضر
زماني ليه يكون واعر؟
تملي بقول كلام معسول
ف خانة الهم أنا مهمول
وفي الأشواق بكون شاعر
ساعات العتمة بتغيظني
وضي السعد يلفظني
لكين الله ...بيحفظني
مع إن العتمة بتكابر
وفي الغربة أنا ..صابر
ابراهيم بدر عبدالله
ليست هناك تعليقات