حلفت ما اتكلم
الشاعر محمد حسانين /يكتب
حلفت ما أتكلم
حلفت ما أتكلم ولا أشكيكى
ولا أقول كلام يشوه صورة ليكى
كان نفسى أصون العهد ليوم ما أموت
كان نفسى للوجع ما يطلع له صوت
لكن جراحك زادت عن الاحتمال
وحملك تقل وهانت وياه العهود
ما تتهمنيش بالخيانة
دا الوجع.... حتى الوجع البوح بيه أمانة
و أدينى أهو بين ايديكى
يا ريتك تحنى وتفهمى
قبل القسوة متصيب قلوب الغلابة
الى أمانيهم تفرحى
وبفرع شجر زى الملايكة تتمرجى
و بكل براءة تضحكى
لا تحزنى ولا تمرضى ولا لعدو يوم تركعى
فتحى عنيكى النعسانين حسى يوم بالشقيانين
يمين هناك أو شمال حبتين
شايفة بعنيك الجدع الى يوم ما داق شبع
والشمس تلفح دا الجبين
ينزل عرق يرسم حنين
وأرضك تحت فاسه تعزف رنين
تطرح جناين قمح وورد وياسامين
يهدى لمين دا الجنين فى بطن شابة من أصل حبة
صاروا حفان طحين
يتسرق جايز يتحرق جايز
عصابة عجايز
يتحكموا ويخططوا
وينفذوا مشروع اثيم
وارجع واعاتبك
لحد امتى هتفضل قساوتك علينا احنا المنسيين
محمد حسانين
ليست هناك تعليقات