رباعيات ستي
الشاعر السيد علي الشريف /يكتب
رباعيات ( ستِّي)
****************
حاجات #ستي_بتعملها ماليها مثيل
ولمسة من حنان إيدها بتشفي عليل
حاجات بهتانة تتلون علي إيديها
وب إيديها بيتحول نوانا نخيل
في عز الضلمة والعتمة تخاف أطفال
وضلمة #ستي_يعني حكاية ويا خيال
وقصة بعدها قصة ف يجي النوم
بحنية تغطيني بطرف الشال
وفي دراستي كانت أمي بتسألني
فين الدرجات ياواد بصلي كلمني
ولو ناقص يادوب درجة أكل علقة
بأكبر جزمة تمسكها وتضربني 😡
اسيبها وأجري كالعادة علي #ستي
وأحكيلها وأشكيلها وأنا ببكي 😢
تطيب خاطري وتزعق كتير لأمي
تقول لو تاني كلمتيه مانتش بنتي
الاقيها بحضن كبيييييييير تطمني
وتزغر لأمي 😠😠 زغرتها تفرحني😂
وبيني وبينكم ضرب أمي بيحلالي
عشان المس حنان #ستي_وتحضني
وبعد الدوشة تسأل #ستي_ع الدرجات
بصوت واطي تقولي بلاش كدة استعباط
ودرجاتك تحسنها وإلا عقابك 😉😉
مش جزمة أنا عندي مأشة سباط
ابوس إيدها وأوعدها أشد الحيل
وأخلاقي هاحسنها بكل جميل😍
هاذاكر طول نهاري دروس ومش هانسي
اصلي لربي وادعيلها في نص الليل 👐
حنانها وقت سمعاني لكلامها يزيد
ولما اغلط تروقني بعصاية جريد
وأنا فاكر حاجات. تديني بنبوني
ولما انسي بتربطلي فتل في الإيد
وساعة الأكل وسعلي بموت في الأكل
وأكل أمي جميل الطعم حلو الشكل
لكن #ستي_لو دخلت في يوم مطبخ
بيبقي الأكل مش عادي تقول مش أكل
تحس إنك بتاكل حاجة من الجنة
يادوب بس تدوق تشبع. وتتهني
وتشرب من إيدها الميَّة تتكيف
وتحلم تبقي دي #ستك_وتتمني
وتحلي القاعدة جنب الفرن وقت خبيز
وتحلي وتحلي لو ويَّانا حد عزيز
أناول #ستي_خشباية تقيد الفرن
تناولني رغيف سكر وطعمه لذيذ
رغيف سكر لكنه شوية كان سخنان
لسعلي إديا فاتنطط م اللسعان
في بيت #ستي_مفيش تلاجة من بدري
قامت تجري تجيبلي التلج م الجيران
سرير #ستي_سرير عادي ب ملَّة ولوح
من الزحمة تشوفه تقول سفينة نوح
في عز البرد نتكوم عليه تكويم وخلف خلاف
لحاف بيخاف علينا وفينا رد الروح
تزعق #ستي_وتنادي ياواد كفياك
إيديك ساقعة ورجلك ساقعة خدها هناك
يادوب اسحب أنا رجلي الاقيها
بحنية تدفيني بحضن ملاك
ف نصيحة ليَّا قبل ما تبقي ليها وليك
ماتبخلشي بحنية أمانة عليك
مد إديك لحد عاش حياته يقول:
أعز الوِلْد وِلْد الوِلْد.....أمانة عليك
#الشريف
😍😍
ردحذف😍😍
ردحذف