حاولت أخبي
الشاعره أمل صلاح /تكتب
حاولت أخبي حبك في قلبي
عن العيون
قامت عنيا فتنت عليَّ
وقالتْ اللي.. ما قلتهوش
والكل شافني وقالوا ليَّ
الحب باين. ما تخبهوش
أسهر ليلاتي وأطوي في آهاتي
عشانه هو ما يحسبوش
مش عارفة مالي
هفضل أداري. واكتم في ناري
وقلبي يصرخ.....ولا اسمَّعوش
ودمع عيني يترجي فيا
عشان أصارحه
وأقوله إنه
أملي ومنايا سعدي وهنايا
وعمري اللي ما عيشتهوش
وهفضل أخبي وأفضل أداري
وسري لازم أنا ما أعلنوش
غير لما قلبك في يوم يدلك
على حب قلبي المتخبي فيه
ويبان لعيني هواك وحبك
واسمع لروحك تنده عليه
ساعتها أقدر أحكي وأقولك
على اللي ليلاتي سهرت أداريه
واشكي لقلبك من ناااار حبي
وعلى سهدي وطول لياليه
وأقول لقلبي بلاش تخبي
وليه يا روحي تداري عليه
قلم أمل صلاح
ليست هناك تعليقات