ما تسئلنيش انا مسلمه ولا مسيحيه
الشاعره نجاة فؤاد البهلول /تكتب
ما تسئلنيش
انا مسلمه ولا مسيحيه
لاني في الاصل انا مصريه
ابويا محمدين وعمي اسحاق
واحنا معاهم قاعدين سوا حوالين الطبليه
نقسم رغيف العيش وقرص الطعميه
ونشرب مية النيل من نفس الحنفيه
ومن قطن مصر نلبس البيجامه والجلبيه
وقفطان الشيخ وعباية القساوسيه
ما تسئلنيش انا مسلمه ولا مسيحيه
امي فاطمه وخالتي ام ميلاد
من يوم ولادتي واحنا كلنا اخوات
عيدهم عيدنا وكل المناسبات
ومنقاش واحد يزين كحك الاعياد
وايدينا في ايد بعض في كل الأزمات
وصلواتنا عباده لله الرحيم رب السماوات
ماتسئلنيش انا مسلمه ولا مسيحيه
اخويا ميلاد واختي كريستين
طول عمرنا مع بعض عايشين
لقمة العيش والقربان نقسمها
سوا واحنا فرحانين
وخليك علي نارك يا ألد الأعداء
مش هتقدر تفرق بين الأخلاء
بقلم/نجاة فؤاد البهلول
ليست هناك تعليقات