قلب المحفظه
الشاعره هدي سيد /تكتب
قصيدة ( قلب المحفظة )
بقلمي هدى سيد
٢٠١٦/١٢/١٥
جوه قلب المحفظة
شايل أنا
كام كلمة
من غدر الزمن
يمكن يكونوا
صحيح كلام
لكنهم أغلى
من المال والكنوز
وقت أما أعوز
أدوب ف حضن
أبويا وأمى
أبص ليهم من سكات
تاخدنى موجه
م الدفا والطبطبة
واسمع ف ودنى
دعاوى ياما مرطبة
تفتح لى سكة
كنت فاكرها مؤصدة
أبص تانى
جوه قلب المحفظة
ألمح ملامح
ذكريات متنهدة
ودموع فراق
فى عيون صبية
متبتة
فى ايديا
بتقول لى بلاش
إوعى الرحيل
ياخدك وتسيب
قلبى هنا
وعنيها زايغة
من مرارة الفراق
ودمع عيني يقول
يا ريتنى ما سيبتها
و أبص تانى
جوه قلب المحفظة
ياخدنى حنين
لصاحب ليا من سنين
وافتكر سهر الليالى
والمذاكرة والامتحان
واحنا بنسمع سوما
ونسرح بالخيال
فجأة نتوه جوه المعانى
ونحضن حلمنا
وننسى إجابة السؤال
نغنى بعلو حسنا
وساعتها نقفل الكتاب
وتاخدنا حكاوى تضمنا
ويااااه يا قلب المحفظة
طبقت قلب الذكريات
رجعته ف قلب المحفظة
ومسحت تانى دمعتى
كملت مشوار رحلتى
بس قلبى لسه عايش
جوه قلب المحفظة
ليست هناك تعليقات