تحت التوته ... معوض حلمي شاعر العامية
~~~~~~~~~~~~
أمانة عليكي لما تعدي
زي النسمه ..
داري عيونك خبي شويه
سحر البسمه ..
دانا ف العشق صغير لسه ..
يادوب باتعلم نظم القافيه ..
حاسبي شويه حني عليا ..
دانتي القلب النابض فيا ..
وانتي دليل الشوف لعنيا ..
وانتي صديق
ف السكة الضلمه ..
وانتي معاني الحب ياسمره ..
ياقمره وقلبي
داب في هواكي ..
باسهر ليلي واستناكي ..
تحت التوته وعند الساقيه ..
باحلم أكون نجمه في سماكي ..
واسرح وياكي لعند الفجر ..
ولا مره خالفت معادي معاكي ..
ولا عمري نسيت ولا مل الصبر ..
ولا مرة رأفتي بحالي وجيتي ..
ولا حنيتي ولا طفيتي ..
بإيدك ناري ..
ولا طمنتي بكلمه ظنوني ..
ف غلبني الشوق
ماعرفتش اداري ..
ولما شافوني الناس باتعذب ..
قالولي سافر مره وجرب ..
هتنسى وتقسى
وجربت اسافر ..
حبيبتي وملاكي ..
لقيت روحي تايهه ..
مشتاقه ترفرف
حبيبتي في سماكي ..
مشتاقه ترفرف
حبيبتي في سماكي ..
~~~~~~~~~~~~
بقلمي الفلاح الفصيح
معوض حلمي
منشأة بطاش
تمي الأمديد
دقهلية
ليست هناك تعليقات