الشاعر ابراهيم القاضى // الهم ••• هم !

 الشاعر ابراهيم القاضى// يكتب .....

《•☆••• الهم ••• هم !•••☆•》
مين دا ..اللى يقدر يغلبك ؟
ولّا يكسر ..مضربك
ولّا يطفى ضى عينك
أو يجفف ..محلبك ؟
هو خاسر وانتى ..ﻵه
هو راجع وانت سابقه ..
ياللى قلبك ..ملو كفك
قلب صافى ..وكف عاشقه !
يا ربيع الحب هدى ...
خلى وردك ..يملا يدى
عبى كاسى بالمحبه ..
حبه حبه ..اسقى ولدى
من حنانها الصبح ..فضى
والسواقى الخضر تحلب ..
والأيادى السمر تكتب..
عن هنادى ..الشعر وردى
يا نديم الحب حاسب ..
ف الملاعب ..حد تانى
حد راكب ع المواكب ..
والمراكب ..و الأوانى !
حد صاد فينا البلابل ..
والصبايا و ..السنابل
والحمايم فوق حفانى ...
يا نديم الشوق سامحنى ..
مش نديمك ..وانت محنى
وانت راسك رهن كاسك ..
طاب معاشك م ..التجنى .
زى ناس لم بتخبز اللمون
لم بتحرز أى ..جون
فوق دماغنا تدق ..هون !
بالجنون ..راحت تغنى ..
الكل لاعب ..والملاعب مش بتاعنا
الكل ضارب والمضارب فوق صداغنا
الكل غالب واللى غالب ..حد غيرنا .!
يا ضميرنا ..يا كاسرنا ....
يا خلعنا من مدارنا ...لحد فين ؟
لحد فين التوهه ..ماشيه بالخطاوى
لحد فين القلب يعند ..أو يقاوى لحدفين ؟
لحد فين وانتى شايله ..الهم ...هم
هم تل وهم ...يم ...
وهم ..قلبك لم يهاودك ..
لو ندهلك ...مره ياام ..
يهون مشالك ..وترمى شالك ..
ع اللى عاصى ..واللى خم !
مانتى برضه يا امه ...ام
ياما قلنا ..وياما ..عيدنا
اللى بايع ..مايشتريش ..
واللى شارب من وريدنا ..
يبقى سيدنا و الياميش..
لو لاعبنا ..نتغلب له
لو يئن ..نبكى قبله
وان نادى له ..يوم شيطانه
هو عارف فين ..مكانه ..
لما يرجع عن جنانه ...
جوا ..قلبى ينام ..يمدد
وانا امه .....
افرح واضمه ..!
لاجل همه ...قلبى يسجد
اغسل له جسمه...
واكتب له اسمه ..انت الوحيد!
انت ابنى ...لو غالبنى
أموت فى غلبك ..
من تانى ...ألاعبك
واتغلب لك من ...جديد ...
ةةةةةةة
الشاعر ابراهيم القاضى
30 نوفمبر 2011م