فوق الحيطان

الشاعر عمرو خيري الصاوي / يكتب

............

 

فوق الحيطان
ياما رسَمْنا قلوب
وكَتَبْنا فيها
م الحروف حرفين
مِشْيت سنين العمر
بالمقلوب
واتارينا طول الوقت
ده راجعين
حاولنا نمسك
أي طَرْف ف خيط
لقينا روحنا ف الهوا
ماسكين
واتكعبلت كُل الحكاوي
ف بعض
فين البدايه
والنهايه فين ؟؟
رحلة طويله
والطريق مقطوع
والسكه ضايعه
والإيدَين تايهين
رغم القيود
باب ربنا مفتوح
وبرحمتُه كُل العباد
عايشين
هو ال قادر
يُجْبُر المكسور
ويشيل حمول الْهَمّ
م الشايلين
................
بقلم / عمرو خيري الصاوي