قلبك فنار
الشاعر معوض حلمي /يكتب
( قلبك ..... فنار )
الفجر شقشق
وانفلق نور الصباح
والعدل ف إيدين البشر
لو يعدلوا طابت جراح
والظلم لساه هنا
نايم مراح
ف اياك تزيط تعمل عبيط
تمشي ف ركاب النار تشيط
خليك حويط
حتى لو كان جرحك غويط
إمسك لجام المجدعه
واياك تتوه ف المعمعه
تركب حصان السربعه
راح يوصفوك بالإمعه
وانت الجريئ
ماشي الطريق
حلمك بريئ
زي غيط مليان خضار
زي ضحكه تطفي نار
قلبك ...... فنار
بيأدي فرضه
وانت نبع الخير وأرضه
وانت برضه
حروف كلامنا
وانت ضي النور وجالنا
ع الوتر تعزف نغمنا
لو تغيب بيزيد هيامنا
ف إياك تغيب
وتسيب آنين
وانت فين .... ؟
إنت فين .... ؟
مستنيين طيفك يزورنا
تيجي ومعاك الحنين
ترسم الضحكه وسلامنا
ترسم الضحكه وسلامنا
________________
بقلمي .......
معوض حلمي
منشأة بطاش
تمي الأمديد
دقهلية
ليست هناك تعليقات