لون السما غامق

 الشاعر الاستاذ سليمان خطاب / يكتب ......

لون السما غامق
===========
الشمس
شاخت ع الشجر
وجوَّا براح الروح
لا عاد فيها دفا
ولا حتى حلاوة روح
جفت عروق المطر
بات اللمون مجروح
بُوح يا طير بالغُنا
مد خطاوي الشوف
ما سمعت غير البُكا
مخنوق ف قلب الخوف
أنا المحدوف على بكره
أبو الجناح مكسور
النخل بايت يشتكى
التمر فيه مقهور
يا عنبة يا مضفرة
ضىِّ القمر عناقيد
مش لاقِي ليه ضلتك
فى دفتر المواليد ؟
لون السما غامق
منقوش على جناحى
تخاف النجمه م العتمه
جرح القلوب صاحي
يا قمرة يا مفتّحه
جوَّا عيون مناديل
مين اللى غمّا عنيكى؟
وفتّح عيون الليل
نفسي أشوف ضحكتى
فوق الشجر عصافير
واسمع غناوى البحر
تطرح بشاير خير
وأشوف البت
أم حلق فضة
تمد إيديها للسما
تتوضا
تنط ف عين الشمس
100 نطه
وبين الملح والشطه
أنا عايش
وكل منايا
ف عز البرد أتغطى