مين هيقولي حبيبي
الشاعر عاطف محمد //يكتب
مين ؟
مين هايقولى حبيبى وقلبى
مين هايقولى صباح الخير
مين هايطبطب على باب قلبى
ويورينى ف حبه الويل
مين هايقولى غمض عينك
فتح شوف عبر بمشاعرك
مين هايقولى فينك ارجع
اشتقنالك قبل خروجك
وبتأخيرك شوقنا قنلنا
ارجع رد الروح جوانا
مين لما افتح باب الشقه
يتلقانى بالاحضان
مين هايحس بوجعى وألمى
شكلى حزين أو جاى فرحان
مين هايقولى تأكل ايه
تشرب حاجه
لبسك مكوى وزى الفل
مين هتكون لى عروسه بتل
مين هاينادى قلبى يدق
مين هايعدى الخطوة يزق
مين هاديها ورده الصبح
وان اخرت الورده ف يوم
ألقى عينها برقه تعاتب
يبقى نسيتنى
أجرى وابوسها من جبهتها
أنسى الدنيا الا سميه
أصل بتاع الورد ماجاشى
مين هايقولى اصحى ياعاطف
علشان نقضى صلاة الفجر
يلا نصلى العشاء والوتر
مين هايقولى خيرك أهلك
من غيرهم والله لانهلك
مين هايقولى كلم ماما
أطمن طمنها عليك
شوف اخواتك حالهم ايه
ود خالاتك
خالك طمن قلبه عليك
عمك عايزك رد عليه
ادعى لابوك واقراله الفاتحة
مين هايقولى ساكت ليه
اتكلم مشتاقه لصوتك
ماسمعتوتش من ثانيه ياعمرى
مين هايقولى يلا نصوم
وقفة عرفة اتنين وخميس
مين هايقولى روح شوف حالك
اطمن انا حافظه ولادك
جوه عنيا روح ماتخفش
مين هايوزع ضحكة علينا
واحنا بنفطر كل صباح
جوه ف عينها أحلى براح
متهيألى يساع الكون
مين راح ألقى الخير ف ركابه
فعل الخير موجود على بابه
غيرك انتى
مين هايواسى قلوب الناس
مين هيكون لى نور وناس
مين غيرك راح أقوله باحبك
وأفضل أحبك حتى طلوع الروح لله
إلى أجمل هدية من عند الله
زوجتى الراحلة جسدا الباقية روحا
نور عينى ونبض قلبى سمية
عاطف محمد.
ليست هناك تعليقات