اللي بني مصر

  طه إبراهيم  /// يكتب

اللي بني مصر

@@@@@@@@@

اللي بناها كان فرعون

عدي البحر ولف الكون
علم كل شعوب الارض
عِلم وفن ورسم ولون
علم كل شعوب الارض
جوه ف بطن الصخر فنون
علم كل شعوب الارض
قبل علوم الناس بقرون
علم كل شعوب الارض
إن الصعب عشنها يهون
علم كل شعوب الارض
إن الجهل ضياع وجنون
علم كل شعوب الارض
إن يداوي جراح ويصون
اللي بناها كان فرعون
كان فرعون لكن فلاح
جوه ف قلبه خير وسماح
يروي الارض بعرقه الطيب
ويوم الجد بألف جناح
عمره ما فكر يأذي جيرانه
أو يتغابي عشان يرتاح
ساعة الشده يكون الحضن
وساعة الجد يصد رياح
كان فرعون لكن نجار
شايل كل هموم الدنيا
نفسه يشوف الدنيا عمار
حافظ كل أصول المهنه
عمره ما يقدر ينسي الكار
مادد إيده لكل الناس
يبني بإيده الحره الدار
يكره كل شعور الظلم
وعمره ف لحظه ماكان غدار
كان فرعون لكن إنسان
قلبه الطيب زي البلسم
يجري ويتعب للغلبان
هو العاكف جوه المعبد
وهو الفارس ف الميدان
هو الصانع هو الزارع
هو الكاتب والفنان
جدي وجدك كان أسطوره
حير كل ملوك الجان
قبل الكاميرا وقبل الصوره
كان بيصور بالألوان
كان بيرص الحجر الخالد
محتاج قوة ميت إنسان
جدي وجدك كان اسطوره
جدي وجدك كان فنان
@@@@@@@@@
بقلم // طه إبراهيم