الغلابة
احمد صبري/يكتب.............
-
الغلابة
هما فين الغلبانين
واحنا بعد ما غميناهم
يقدروا يشوفوا الطريق
وإحنا بنكسر خطاهم
شردناهم جوعناهم
موتناهم بالحيا
فوق التراب دفناهم
حرقناهم بالغلا
معقولة هنخاف منهم
وهما اصلا ميتين
من فقرهم وقهرهم
كلهم متقطعين
معقولة هنخاف ينزلوا
ويطالبوا يرجع حقهم
يتسجنوا يتقتلوا
زي اللي راحوا قبلهم
كل دول هما الفلول
وكل دول مش فاهمين
حد فيهم حس دول
حد شاف المجذوبين
اما دول فاهمين غلط
ودول دماغهم كالزلط
بس دول غاوين عبط
يروحوا فين المغلوبين
-
قطر والسواق تمرجي
ع الخراب عمال بيجري
مص دمي شل فكري
عو عزمي بخ بكري
مين يقول ان الوطن
ارضه للبيع والإيجار
خيره ديما للنصابين
مين يقول ان البطل
يبقى خيبة إنتصار
وهم عالم مسندوين
البطل هو القدر
بكره يجي وينتصر
والظلام هو الخطر
ونهايته لمحات البصر
لما يبقى الفجر عيد
يجي ناصر المظلومين
يتحرروا كل العبيد
يبقوا فعلا امنين
امنكم مش للجميع
اكلكم سحت وبنضيع
منكم لله يا عالم
كلكم في ضلال مبين
-
مهما بتغيب الحقيقة
مهما هتخبوا الحريقة
ربنا عنده المظالم
والاسامي مكتوبين
الغلابة هيروحوا فين
إتخدعنا متمردين
وطلعت كلها كدبة
وصدقوها الطيبين
حتى الغلابة متقسمين
في زمن الله يعين
نصهم خايف وصابر
نصهم مستبيعين
أحمد صبري
ليست هناك تعليقات