شيء م الذكرى
ابراهيم خليفه رمضان/يكتب..............
شيء م الذكرى
وبتصحى يا شوق وتنام
على فرشة شوك مفروشه
حلم بيبدر فيها أنين
شاخص تحت جفون الننى
يحكى حكايه ويا حكايه
أطير هناك مش عارف ليه
لكن عارف لحظة لما الحلم يجينا
انى بكون فى حالة نوم
حاضن جوه القلب الصامد كلمه
خايف أندم أن فى يوم عرفت أكتبها
أو اتهجى حتى حروفها
يوم ما اشوف القمره وهي بتخنق شئ جوايا
لما تقرب جنب الغيمه
تطمس كل معالم ماده الروح بالمعنى
وهياكل لسه بشوفها واقفه قصادى. .....
فاكر لما صحيت من النوم
دقيت جدار ويا جدار
علشان اعرف هالة القمره راحت فين. ..
نامت جوه الحلم ولا الحلم كان بيخاطر
تحت جدار
عاوز لمسة ايد تهزه
لأجل يهيل
وافتش تحت ركامه
شئ من الذكرى
لحلم أسير
كان بيعانى فى نومه
وف تفسيره
لحظة لما الحلم يدوب
ناقش جوه الصدر الغامض
كل معانى الحب
اللى تحطم اى جدار
متغطى بوعد
وعد الليل الدايب جوه نهار مشنوق
للشاعر ابراهيم خليفه رمضان
ليست هناك تعليقات