أمي
الشاعرةالمبدعة امال بدر/تكتب..
أمى بالعاميه المصريه. رقم عضوية النقابه١١٨
عارفه يامه انا النهارده
بقيت ام وكمان جده
لكن لما ببص لصورتك
بعود ياامه من تانى طفله
وافتكر ايام زمان
مع اخواتى بنين وبنات
وانت معانا قويه عفيه
ربتينا وعلمتينا
ولا مليتى ولا كليتى
وفاكره يا امه اول حرف
علمتينى عربى وانجلش
وياما كنت بتقرصينى
لو قصرت مره فى واجب
وفاكره بيتنا كتير كان واسع
ولما اشتد عودنا شويه
شغل البيت قسمتيه علينا
وفى اجازتنا من المدارس
واحده تخش معاكى المطبخ
وواحده تنضف بس بزمه
والمواعين غسلها علينا
كل واحده تغسل يوم
وللصبيان طلبات الشارع
وفاكره ياامه لما عملتى
لينا عروسه وخيطيها
وعلمتينا ازاى نفصل
ليها فساتين وكمان چيبات
وعلمتينى قبل ما انام
اقرا كتاب لنجيب محفوظ
أو احسان عبد القدوس
وفاكره شقاوتى انا واخواتي
لما نهزر ونعمل ظيطه
وتنذرينا وتحذرينا
اول بابا ما يجى م الشغل
ندخل فورا على سرايرنا
ومنعملش دوشه وظيطه
وفاكره أنى بحب السينما
وكانت عندى احسن فسحه
لما اكون فى دراستى الا ولى
بابا ياخدنى اخش السينما
وفاكره كمان وانا فى اعدادى
كنت بلعب فى فريق كوره
بيتنا يطل على مدرستى
لما أتأخر فى التمرين
كانت تبقى وقعتى سوده
مالبلكونه تنادى عليا
وتزعقيلى وتأنبينى
وانا دايما كنت بطنش
والله ياامه كنت جميله
وايامك كلها كات حلوه
مسواك إنشاءالله الجنه
والف رحمه ياامه عليكى
ياست الكل واجمل ام
امال بدر
ليست هناك تعليقات