كلام بجد
الشاعره المبدعه حنان محمد عبد العزيز/تكتب
كلام بجد
والايد على الخد
ليه كل ما نفتح طاقة امل
نلاقي الف سد وسد
ليه بقى الدم مالوش حد
ليه نقتل ولادنا
ولاد الجمعة
ولاد الحد
وسيبين ولاد السبت
وهم دول راس الحيه
قاعدين نلملم الالم
بكى وعويل وطال الليل
دا مش مسلم ولا مسيحي
دي مله تانيه من العدم
كلامنا بجد
ليه الحزن ماله نهايه
وليه السلام ماله رد
فهمني يا عم فهمي
هلال وصليب
على راس الحاره
علم وعلم
يساوي مناره
غبي وغباوته
فاكرها شطارة
يولع بلد
ويحرق كبد
بعقب سجاره
فهمني يا عم فهمي
دا مش مسيحي
ولا حتى مسلم
ف مسلم يسب
ف مسيحي يشتم
شربنا الصبر
ومره سنين
ومش فهمين
دي ايد مين
تزرع شر
ونحصد انين
دول ابدا
مش بني ادمين
لا من بلدنا
ولا من ولادنا الطيبين
كلام بجد
اصلك يبان من فعلك
خاين جبان
مالك امان
زي فار الغيط
تستنى الزرعه
وقت ماتنبت
تفحر وتنخر
وتشل عودها
اصلك واطي
ديما مطاطي
تقرص وتلبد
تحت البطاطي
خاين جبان
عامل بتفهم
وانت مخك
مبلطاطي
كلام بجد
مهما تحصد
ارواح ولادنا
هنرمم كنيسه
ونبني مدنه
ونعمر بلدنا
المسلم عم
والمسيحي خالنا
وانت جبان
مالكش مله
خسيس سعران
ف بحور الدم
عايم و غرقان
بكره يجيلك الطوفان
كلام بجد
وعمر دينا ماكان غايب
مسلم مسيحي ديما حبايب
ضد الارهاب بتصد صد
ومها قالوا ومهما فتنوا
ايدينا واحده ديما تسد
كلنا واحد وإلاهنا واحد
الدين بيبني وعمره ماهد
..... كلام بجد .......
#حنان_محمدعبدالعزيز
ليست هناك تعليقات