داري وخبي
الشاعر احمد طلبه //يكتب
وداري وخبي في مشاعرك
ولا تقولي إيه جواك
أنا ولا طبعي من طبعك
ولا فعلاً أنا حساك
ولا في حاجه جوايا
تقول إن انا بهواك
ياريت تبعد كدا كفايا
ولا حباك ومش كرهاك
==================
أنا عايشه بأوقاتي
وحلمي لكني مش شيفاك
ومختلفه كدا حياتي
عن اللي بشوفه أه جواك
صحيح بتحس بسكاتي
ومش معناه أنا حساك
عشان بالفعل دقاتي
في قلبي تقولي مش عايزاك
ياريت تحسبها برجوله
وتعرف إني مش رايداك
لا عمرها تبقي معقوله
تحس بواحده مش حباك
هقولهالك وبسهوله
ياريت تنسي وبترجاك
وبالنسبالي محلوله
وعن نفسي انا مسمحاك
===================
أنا بالفعل بحترمك
ولا شوفت حاجه معاك
لكن دي بجد مشكلتك
مشاعرك لكنها سرقاك
وانا بصراحه كلمتك
عشان تفهمني مش حساك
وأسفه إن انا ألمتك
وبعديها أنا سيباك
أنا عن نفسي فيا ضمير
ومش معناه بإني ملاك
لكن بتمني ليك الخير
مع اللي بجد يتمناك
ومن غير كدب أو تبرير
أنا دلوقتي مش ظلماك
وبكره تلاقي غيري كتير
وتلقي اللي اكيد تهواك
=================
أحمد طلبه
٢٠١٧/١٠/١٢
ليست هناك تعليقات