امي
الشاعر اندرو فرج /يكتب
حضن أمي
أمي
بتلومي عليّ ليه يامه
وليه مني بس زعلانه
أنا دمي سال قدام
عينك وعن لمه أنت
مش داريه وكسلانه
طلعتينا من تحت
جناحك وأنت حمانا
آه يا مه ياما أنت
قاسيه علينا
وهانت عليك دمانا
وبتلومي علىّ ليه يامه
نسيتي يامه ولا فاكره
لما ما لقتش ليّ فيك
ذكره
جبت فيزا وشريت تذكره
وقلت أعمل حساب لبكره
نسيتي لما ملقتنيش فيك
ولا لما بعدتي عني إيديك
نسيتي إنك غربتيني يامه
وحرمتيني منك وماشوفتش
منك حتي لحضنك ضمه
آه يامه
شلت لوحدي مر الغربه
والذل والعذاب سقوني
همه
طيب فاكره أول مره
اسيبك فيها
لحظه وكانت صعبه
بتلومي علىّ ليه يامه
أنا أبنك ومحتاج الضمه
أنا دمي على الحدود سال
وغيري أخد وسام الأبطال
وبرده زعلانه ومني حردانه
نسيتي لما بيتي هدوه
حتي بهايمي كمان سموه
ومحلي عشان ديني حرقوه
وبوضع اليد غيطي أخدوه
وأنت علي رقامي عديتي
وبرده زعلانه ومني حردانه
وبتلومي علىّ ليه يامه
ودمي اللي سال في سيناء
كنت أنا ومحمد ومينا فاكره
ساعتها مكنتش حاجه تفرق
ما بينا فاكره
بدمنا علي علمك كتبنا أسامينا
أمتي بقي ياما لحضنك تلمينا
وتحت جناحك يا مصر تحمينا
وكلنا أولادك تساوي وتعاملينا
يبقي ليه زعلانه ومني حردانه
وتلومي علىّ ليه بس يا مه
كلمات أندرو فرج
عاشق نيلها
15/10/2017
ليست هناك تعليقات