أحلام ابراهيم
الشاعر علي البحيري /يكتب
((الحلقه الأولى من))
.....(.احلام ام ابراهيم.).....
فى العصر وانا قاعد حزين
عمال افكر فى البلد
لمحت خالتى ام ابراهيم
فرحانه قال جابت ولد
قاعده تهسك فيه تقول
الحمد لله الأحد
يارب عمرى يطول ياواد
لما اشوفك شيخ بلد
قربت منها وقلت ليه
عايزه تشوفيه شيخ البلد
الناس فى حالتك دى تقول
دكتور كبير اومستشار
او حد مشغول بالبلد
قالت بقولك ايه ياواد
اسكت بلاش خيبه ونكد
دكتور دا ايه او مستشار
وكراسى ايه سيب الولد
انانفسى يصبح شيخ كبير
بمحبه مع عدل اتولد
حاكم بدون كرسى ووزير
عادل بدون سيف او بارود
من هيبته يخشاه الأسد
خلينى ادعيله بصوت
عالى يزلزل فى الولد
يحكيله حلم امه وابوه
وناس كتير ملهاش عدد
ويحرر القدس الاسير
ووطنا على طول الأمد
يشرحله حلم الغلبانين
والمقهورين من غير سند
قلتلها دول حيصنفوه
تيار جديد وحيترصد
قالتلى طاب قوم فز غور
تيار دا إيه جاتك مرض
وشويه عدا الشيخ خميس
وفى إيده استاذ الأدب
بعد ما رددنا السلام
قلت الحكايه والغرض
قالولها ياام ابراهيم
بصى علينا شوفى العجب
استاذ كبير وأمام كبير
مديون فى تجهيز الولد
ادعيله يصبح يوم مدير
للشرطه او جيش البلد
وعليه نجوم نسر وسيفين
نياشين كتير فاقوا العدد
وعسكره ماشيين وراه
على الخطوه ماشيين فى البلد
او نجم مشهور فى البلاد
بالكوره حريف اتولد
او حتى يطلع واد سفير
مالوش نظير من غير عقد
او هندسه وطب وقانون
مهموم بأحوال البلد
قالت لهم مبلاش هجوم
على الحاله وظروف البلد
روحوا يالا اشغالكم بلاش
هري وكلام ملوش سند
روحوا شدوا شيشه وطاوله روح
على القهوه حريفه وعجب
وتقولوا نار واسعار دمار
ونهاركوا ليل والليل نهار
والحاله شيكا بيكا ومدد
ابنى حيصبح شيخ كبير
شعراوى وحكيم له وتد
استاذ فى احكام الحياه
نور الإيمان زان الولد
‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘.
.........................................
(الحلقة الثانيه من احلام ام ابراهيم)
وفجأه جه صوت من بعيد
يعتب علينا بدون سبب
صوت خالتى صابره ام اسماعيل
معروفه بالروح والجلد
قالتها ياام ابراهيم
خمسة عليكى وع الولد
قولى ربنا يستر عليه
من الفيروسات ومن العقد
ومن الأهات ومن البنات
ومن السياسه والغضب
وإشي اعلانات ماليه الشاشات
رقص وصجات
وصوت بعيد عامل صخب
لبسين هدوم من غير لزوم
ودى موضه قال ياللعجب
والبنطلون عامل جنون
بيقطعوه ويهلهلوه ويحزقوه
يخساره ساب من غير سبب
ياام ابراهيم شوفتى( العجب )
كان عندى كام بنت وولد
ربيت وعلمت الولاد
كتاتيب وقرآن بالأدب
دروس كتب وملخصات
مصاريف كتير من غير عدد
الواد بقا مهندس كبير
واخد الشهادة بالتعب
وبقالوا كام سنه بالكفاح
مهموم بحاله عشان غرض
يخطب ويفرح بالحلال
من بنت حلوه من البلد
ولما روحت اخطبها ليه
قالت خلاص ياام الولد
انا جانى بختي من يومين
جايب شنط من غير عدد
وقلي حتزينى القصور
والوزن حيكونلك دهب
والفيلا على النيل والزفاف
حيشرفه رئيس البلد
روحى يالا على روما ابعتيه
يمكن يكون حظه اتولد
او شوفى وسطه وطوعيه
فى الشرطة او جيش البلد
اما البنات يادى البنات
(فى غلبهم حتى الممات )
الاولى اخدت هندسه
والثانيه نور ومدرسة
والثالثه دكتورة سنان
والكل زينه ومريسه
وجه النصيب زف البنات
بعد الجهاز والا نتيكات
اشى غسلات واشي ثلاجات
وانواع كثيره وهات وهات
ومها جبتى من الشوار
عمرك ما ترضيها البنات
حطيت عليهم تقلهم
ودعيت إلاهي بسعدهم
والزفه على بيت فرحهم
والحمل زاد من غير ميعاد
جات الشيكات تعب الولد
قال ياما سيبك م الجواز
وبلاش كمان شقه وهدد
من الصبح راح اطلع جواز
وخلاص حسافر للابد
اعملى تحويشه وجهاز
سياره ع الموضه وعزب
وارجع وكل الناس تقول
محلى الشياكه والادب
محلي الرخام ع البوبات
والبرسلين حتى العتب
..................................................
(الحلقة الثالثة من أحلام ام ابراهيم )
المشكله مش فى الولد
المشكله فيكم يا ناس
وانتوا الخلاص وانتوا السند
ولا عمر غاصب هدنا
ولا عمر صهيون همنا
اول ما بينادي المنادى
حى يا مسلم على الفلاح
بنلبى حى على الجهاد
لو يصحى فينا نهجنا
حتشوفوا خير ملوش عدد
لو يرضى عنا ربنا
حتنولوا بشراه والمدد
لو تقوي وياها الايمان
راح تنعموا فيه للأبد
تنزل عليكم من السماء
والارض راح تنسى الجدب
*******
ياولاد بلادى الطيبين
المشكله مش فى الطعام
اصبح بكام او فى الخضار
ولاحتى فى سعر الذهب
المشكله مش فى الفواكه
ولاحتى شغل الهرمنه والسرطنه
ولا حتى فى سعر العلاج ويا المرض
المشكله احنا فى حصار ادى لدمار
من يوم ماغاب عنا الثواب ويا العقاب
من يوم غيرنا كتب لنا فكر لنا
خطط لنا ورسم لنا ؟
قال إيه دا حامل همنا يا غلبنا
ونسى ساعتها يقولنا انه حيشرب دمنا
يدى القروش يملى الكروش
وكل عام بتزيد قروش فوق القروش
فايدة وخراب والخير سراب
لا يسد باب ولا يحمى باب
بالزمه دا اسمه كلام
بسهوله نترك دقننا لعدونا
واحنا الحضارة والتاريخ
افضل شهود على عزنا مع مجدنا
مصر كنانة ربنا
مصر اللى قال فيها العزيز
خزائن آلأرض هنا
مصر اللى كرمها الإله
والعزه والأمن هنا
مصر اللى شافت انبياء
مروا وعاشوا كتير هنا
مصر اللى قال عنها الحبيب
خير الجنود دوماً هنا
ومصر مقبرة الغزاة
هكسوس تتار ماتوا هنا
ومصر صاحبة التكيه
والكسوة كانت عندنا
والزفة تطلع كل عام
لبيك يابيت ربنا
*********
وعدونا دوره الاصيل
انه يشتت جمعنا
انه يفرق شملنا
الاخ يصبح ضد اخوه
لو مش سياسه ومنهجه
بالكوره برده وصل لنا
بالموضه برده وصل لنا
ويقول تطور فى الحياة
يالا تعالوا لفكرنا
وسيبكم بقا م الدروشه
دا العلم والقادم لنا
فاكر اننا تهنا خلاص
ومفيش رجوع تانى لنا
*******
ياحجه ياأم ابراهيم
ياكل الموجودين هنا
لازم نرد لربنا ولنهجنا
وربنا قال ننصره
ينصرنا ويبان بأسنا
والارض تتزلزل تثور
بعدو دينا وشرعنا
واحنا الثبات مضمون لنا
مع ((ربنا)) (ونبينا )
وإرث معصوم من الضلال
منهج ونور متروك لنا
قرأن وسنه نحققه
عمر العدو مايزلنا
مع تمنياتى ان تنول اعجابكم
م/على البحيرى
ليست هناك تعليقات