انا واحد على قدي
( أنا واحد على قدي )
----------------
أنا صيتي في الخلق سمع
في الحق واضح صريح
يسمعني أبو القلب يدمع
شاعر وفلاح فصيح
كتبت الشعر بأصوله
بدون تجريح
وابدأ قولي بالفاتحه
ويجي الحرف ع البطحه
تقوم العقول شاطحه
تقول عني وانا المعني
وليه ياعم تجرحني
وتفضحني بين الناس
أقوله ياعم بعد الشر
واحلف يمين الله
أنا باكتب بحق الله
لاعمري تاجرت بحروفي
ولايمكن هابيع الآآه
ولايمكن هاعيش حيرتي
أنا قلمي بيكتب آآآه
ونبض حروفي من سيرتي
لا انا باير ولا معطوب
ولاخايف من المكتوب
أنا بيتي ضد الطوب
مانيش مغصوب ولا غشاش
أنا أصلي هنا في بطاش
وتد مدقوق في سابع أرض
باصلي العزة سنه وفرض
واطوف واسعى واصون العرض
ومش ذنبي إن انا باكتب
عن المجاريح
فاييجي الحرف في دماغك
يجيب داغك
في ثانيه تطيح
وتحلم حلم مش قدك
تروح مسطول يروح شدك
تنام دايخ
كابوس في الحلم صور لك
عن إني باغير منك
تقوم قايل كلام بايخ
وانا في الأصل مش شايفك
ولا سمعك .. ولا حسك
الظن في شرعي عديته
ودوست عليه
وعندي كتييييير من الأمثال
مثل ستي دليلي فيه
( قتيل إيديه ماينبكي عليه )
ف مش ذنبي إن انا محبوب
وانا شاعر
على نظم الكلام محسوب
بلاقي حروفي مبدوره
في كل شتات
ولما إمشي تمشي ورايا
كأني الشيخ أبو الكلمات
وانا سارح مع وفاسي
تناغش فيا إحساسي
وتعد عليا أنفاسي
ولو زعلان تروح خايفه
تقول مالك
وإيه غير احوالك
وليه ضحكتك جافه
أقول مالوا ومالت الكفه
فتعمل م الحروف زفه
وتجمع م الغيطان نوار
وتبدر سكتي أنوار
وتدفع للفرح ديه
وارسم ضحكه في عنيا
واقول مبسوط
والآقيها محلوه بطعم التوت
وتاخد إيدي في إيديها
وانا وهى قدر مكتوب
وانا واحد على قدي
برص حروفي من كدي
ومشاعري تحيي قلوب
ومشاعري تحيي قلوب
----------------
بقلمي الفلاح الفصيح
معوض حلمي
منشأة بطاش
تمي الأمديد
دقهلية
ليست هناك تعليقات