روحي حايره

الشاعر معوض حلمي/يكتب 

قصيدتي التي أذيعت على قناة مصر الحياة الفضائية برنامج الجمهور العربي أول أمس 

https://m.youtube.com/watch?feature=youtu.be&v=-sdpAEWTYNs

........................

" روحي حايرة "

........................

العمر فات ... 

والقلب مليان ذكريات  

منها اللي مات ... 

ومنها اللي 

عايش من سكات ... 

ومنها اللي مزروع 

بالحنين يطرح أنين ... 

ودمعتين  ... 

دمعه للعمر اللي فات ... 

ودمعه بتعد السنين ... 

وكلمتين 

كلمة ندم وكلمة ياريت ... 

ومابين حنيني وبين ياريت ... 

انا اتهريت م الإنتظار ... 

والصبر قايد جمر نار  ... 

بين البشر عايش أثر  

عدى عليه مليون نهار ... 

لو بإيدي الإختيار ... 

هاختار أكمل رحلتي 

واخد قرار ... 

ياإما جنه ياإما نار ... 

دانا روحي حايره   ... 

داير ف دايره ... 

نهارها ويل وليلها ضلمه... 

وغربه ضايع فيها الطريق ... 

باحلم ببكره يكون جريئ  ... 

ويكون صديق ... 

ويعدي بالحلم الغريق ... 

ويلاقي مرسى ... 

أو سفينه تساع مافينا  ... 

وتعدي بينا لأي مينا  ... 

مكان ماترسى ... 

من غير صديق ... 

ماشي الطريق ... 

زي الغريق ... 

مش لاقي شط

يشيل همومي  ... 

ويعدي أمسي زي يومي .... 

ويعدي أمسي زي يومي .... ...................................

بقلمي الفلاح الفصيح 

معوض حلمي

منشأة بطاش 

تمي الأمديد 

دقهلية