الشاعر مصطفى فريد ... يكتب ... جزء من رسالتي ل أمي وأبي من ديوان ضي نهار
من ديوان/ ضى نهار
للشاعر / مصطفى فريد
رساله للقب إللى حن
وخبى قلبى من الزمن
قلب كان وقت المحن
وطن ونبض ودار سكن
محموله فوق خد الرياح
مستعجلة بعلم الوصول
شارع الكوثر يمين
صندوق بريد جنة عدن
بعد حروف البسمله
وعلى نبينا ميت صلا
طه ختام الانبيا
شفيعنا آخر المرحله
أما بعد ٠٠ تحية مني
ياللى عمر ماغبتى عني
ليا مطلب بس عندك
لأجل حزنى ماينجلى
بالله عليك طمنينى
عامله ايه يا نن عينى
البكا فى عنيه طول
بس أنا مؤمن بدينى
الفراق هو إللى قاسى
صعب يا ام القلب ماسى
من دعاك املى كاسى
صبرينى فراق سنينى
طمنينى ولو بكلمة
كلمة واحده تهدى حيرتى
اكتبيها بسيل دموعى
ابعتيها قوام حبيبتى
هدى قلبى مابين ضلوعى
عامله ايه فى الجنة انتى
مش سكنتى قصر عالى
ومن ضياء نورها اتعجنتى
واحشه قلبى ياحب عمرى
ياحضن كان لى تحت امرى
لما أحس بحزنى ألقى
الروح تسيبنى عليكى تجرى
تعشق الإحساس فى حضنك
ارمى همى تحت قدمك
تلمسى بإيدك جبينى
ينطلق نورك فى صدرى
ليست هناك تعليقات