وحيد أحمد إبراهيم ... يكتب ... أسفي على ليل يلملم نجومه

أسفى على ليل بيلملم نجومه
ضاع منه طعم السهر
وشجر كتب على ورقه همومه
ماعاد بيطرح ثمر
وبحر اهله عطاشى صاموا
عشان موجه عكر
والزمن مين يقدر يلومه
ولا يغير القدر
وعلمتنى ارادتى
مبكيش ع اللى راح
واقول سماح مهما
تكبر الجراح
جوايا رضايا ينتصر
مساعدنى فى حياتى ارتاح
.ولاهسمح للزمن يهزمنى
ولابعد حبيب يألمنى
انا ارادتى تطمنى
عمرى ما هقول مظلومه
ولاهمشى عكس الريح
ولا اعوم على عومه
انا بنت الشرق الاصيله
فى الصلابه معلومه
ارسم البسمه
فى عز احزانى
وانور الظلمه
واردد الاغانى
واغزل من الفرحه
لون فستانى
ولو الحزن نادانى
هقوله
فى الفرح معزومه