حلم

مها خفاجى

لى بالي... 

أنا بس في ليلي صاحية... 

وكل الناس 

نايمين

أتاري دموعهم... 

سنين طايحة .. 

وع الجرح مش

قادرين

علي بالي..

همومي كلها رايحة.. 

مفيش تاني هموم 

جايين

أتاري نهار بطوله سارحة .. 

وفي الليل عندي 

متواعدين

أنادي العشق والفرحة .. 

يرد القلب بهزيمة .. 

دول تايهين

أشاغل نفسي وأشغلها .. 

بفرحة أسرقها 

من ناس معديين

وأصب الهنا فقلبي.. 

بصورة واد 

مفيش منه 

ياناس اتنين

سمارُه .. ده أنا احبه.. 

وأتوه في العين.. 

قمرطالع

بغمازتين

و طوله 

يدوب على مقاسي .. 

وكتفه يشيل. . 

أنام عمرين

وأحبه بابتسامة روح .. 

تملا الوش.. 

وأحب العين 

في العين

وأحبه 

وهو شايلني على جناحه ... 

وطاير بيا .... 

بين فضايين

وأحبه 

وهو عاصرني مابين ايده.. 

وأتوه فاللحظة 

قول ساعتين

وأعيش العمر وياه .. 

وأنا ناسية.. 

أفوق من حلم

العاشقين

ألاقي خبطة أهي جامدة 

وبابي مكسور بالعافية .. 

الضلفتين

وست الكل أهي واقفة.. 

وبتنادي.. 

وبعيوني أرد أقول: 

نعمين

ولا كلمة قدرت أنطق..

وبالي مشغول .. بيدور

هو الواد ... راح فين ؟؟؟