طفلة بريئة

 

 بقلمي الكاتبة والشاعرة حنان محمد عبد العزيز

طفلة بريئة
========

فرحانه بفستانها الأبيض اللي بلون قلبها

وشريطة حمرا جميلة ملفوفة على خصرها
وفيونكة بيضه تحفة مربوطة في شعرها
فرحانه بالدنيا الحلوة فاتحلها حضنها
نفسها تعيش في الجنه بس على أرضها
فكرها أن الحياة سهلة مرسومة في مخها
عايزه تعيش الدنيا بطولها وعرضها
بس بدون ما تنجرح ولا حد يمسها
طفلة بريئة في بداية عمرها
عاشت بالخيال في دنيا تحبها
دنيا وردية بدون أشواك زي مانفسها
تضحك وتجري وتلعب السما غطاها
وقت ما تتعب الأرض الخضرة فرشها
عايشة فراشة طايرةولا حد يهمها
أما أنت ِ صحيح صبية خفيفة دمها
شوية رقه وشوية شقاوة والهداوة طبعها
نفسها تعشها دنيا مرسومه على ورقتها
بس الدنيا صعبة حقيقي مش زي رسمها
خايفة تعيش الواقع بكل قوة بتبعده عنها
عايشة في دنيا الطفولة مش عارفه سنها
شهور ولا سنين محسوبه من عمرها
خليها في دنيتها عايشة بتقضي وقتها
ترسم على شجرة قلب وتتحاما بضلها
تقطف بأديها وردة جميلة تشم عطرها
خليها في دنيا الأحلام سعيدة يا بختها
----------------------------------------
بقلمي الكاتبة والشاعرة حنان محمد عبد العزيز