احلى صبيه
الشاعرالمبدع أميرالشاعر/يكتب...
احلي صبيه
بحبها ودوبت أنا فيها
وروحي ترخص لعنيها
بعشق غيطانها وصحاريها
ماهي جوه عيني احلي صبيه
علي ارضها انا عشت ياناس
غارقان دفا ووفا واخلاص
بلدي في ليلي قمر وناس
وبحبها وساكناني هيه
شربت من نيلك ياامه
مشتاق لحضنك والضمه
دنا نفسي ارجع للمه
علي شط نيلك يابهيه
حبك في قلبي ملوهش مثيل
عاشقك ياام الطرف كحيل
يانور بيضوي في عتمة ليل
ياقمر زاهيه مضويه
فاكر شقاوتي وانا صغير
بجري في حضنك واتمخطر
وحبي ليكي ديمه بيكبر
يامصر ياضي عينيا
فاكر الحضن اللي شالني
لسه جوايا وساكني
فاكره لما قام وجابني
وقاللي ماتغبش عليا
بتمني ساعة مااجيلك
ارد دينك وجميلك
واتملي ياسمرة بنيلك
ساعه شروق الفجريه
والمس بكفي الزعفران
اللي طارح فيه ريحان
والله منظرهم جنان
وهواكي يملاني عفيه
بحبها ودوبت انا فيها
وروحي ترخص لعينيها
بعشق غيطانها وصحاريها
ماهي جوه عيني احلي صبيه
بقلم /أمير الشاعر
ليست هناك تعليقات