استرجل
الشاعر اشرف الدغيدي ///يكتب
( استرجل)
لما انت مش قد الحب
بتفكر تحب ليه
ولما انت متعرفش الغرام
مستعجل ليه عليه
دا الحب عمره ماكان كلام
ولا الغرام نظره وسلام
دا الحب ياواد مسئوليه
عمره ماكان بس حنيه
وللغرام ياواد أصول
يقدروه ولاد الأصول
...........................................
هو انت عشان جميل حبتين
وعارفلك في الحب كلمتين
عمال تغني ع البنات
يابني كفايه من عمر فات
واقعد ذاكرلك كلمتين
وخلص ياواد دراستك
بلاش السنه ف سنتين
وريح الناس من خيبتك
ولما تخلص حب براحتك
......................................
تعالي هنا ياواد قدامي وقول
ليه سايب كده شعرك يطوول
إياك عاوز تعمل زي ابن خيبتها
اخو البنت اللي انت حبيتها
أُم بنطلون مقطع علي ركبتها
وتعمللي فيونكه وديل حصان
ولآ كعكه وضفيره كمان
........................................
جاتكو نيله وخيبه تقيله
كولكو عاملين دقون
وياريتها سُنَّه تكون
عاملينها منظره وحيله
حتي الجمعه مابتركعوهاش
والأخلاق مابتعرفوهاش
يابني استرجل انت وهو
فضحتونا بره وجوه
....................................
شوف يابني شباب زمان
كانو أخلاق وللبنات آمان
من جواهم بني آدمين
وللرجوله مشرفين
وف شغلهم مخلصين
علي لمبة جاز كانو بيذاكرو
ودروس ماكانو بياخدو
وف الآخر متفوقين
ورغم إنكم متنعمين
كتير منكم فاشلين
استرجل يابني انت وهو
فضحتونا بره وجوه
...................................
خواطر ( أشرف الدغيدي)
حقوق الطبع والنشر محفوظه
ليست هناك تعليقات