رسالة حنان في عيد الأيتام

الشاعره سهير ابراهيم //تكتب 

.....رسالة حنان فى عيد الأيتام ...

أول جمعة من إبريل... نيجى نكرم كل يتيم

ونمسح بإيدينا دموعه .. وحُبنا أعظم تكريم

ونرسم بسمه بعيونه ...ونهمس فى ودانه النونو

إوعى تكون حاسس بعذاب.. أو حرمان من الأحباب

كلنا أهلك وأحبابك...حواليك إخواتك وأصحابك

بدال الأب الواحد ميه .. بيقدموا ليك أغلى هديه

رحمه وحب وود كتييير .. وبيتمنولك كل الخير

ورسولنا قدوه وأساس ... كان يرحم كل الأجناس

دا رسولنا كان م الأيتام .. بأخلاقه ضرب الأمثال

مره واحد راح يشكيله ....قسوة قلبه نصحه وقال:

روح إمسح على شعر يتيم .. هتحس برأفه وحنان

وياسلام لو خدته تراعيه ..شوف ربك يجازيك بإيه

يبارك فى رزقك وولادك ..واللى عملته فى يوم تلاقيه

دى الرحمه صفه للرحمن ..بيرحم بيها الإنسان

نِفسى الناس ترجع تتأثر... بمشاعر غيرها وتتحصر

على ظلمها غيرها من الناس .. ويرجع فينا الإحساس

ونعيش فى سعادة وأمان .. ولا يشمت فينا شمتان

ربنا يحفظ لينا بلدنا ... ويفضل فيها الخير عمران

ويوحد ديماً كلمتنا ...ويبعد عننا كل شيطان

يللى كفلت يتيم بجميلك ... ومسحت دموعه بمنديلك

يكتر ربنا من أمثالك ... ومن كل قلوبنا بندعيلك

وتعود بيك تانى الأيام .. ويسعَد بيك كل الأيتام

بقلمى / سهير إبراهيم ( أم شريف )