مين فينا إللى خان

 الشاعر/عزالدين جبريل// يكتب .......

مين فينا إللى خان
ومين إللى إشتكى
وقال ما فيش أمان
وبأرخص من التمن
باع الحب إللى كان
هو مين غيرى أنا
هيقدرك ولا يستحملك
وبكلامه يعرف يوصفك
وقصاد الناس يجملك
ومين إللى كان بيوعد
وبكل وعوده ليكى وفى
وبرضه كان حضنه دفا
وكان يساعك ويتحملك
بعتى حبى ليه وبكام
وليه رضيتى تتذللى
وليه تعيشى ف الهوان
ولا مين ضحك عليكى
وقال ف عيونك كلام
وقال بشتاق واحن لك
وهو مين تعبه هواه
ولا بعدك بالنار كواه
ومقدرش برضه يهملك
إنتى شايفانى حقيقه
ولا هتقولى ليه طريقه
إزاى أعبر عن شعورى
وازاى ف خيالى برسمك
بعتى قربى بالبعاد
وخلصتى صبرى بالعناد
ولافى يوم جيتى معاد
وكل دا حصل وصار
ولسه قادر خيالى يجملك
قطعتى كل حبل للوداد
وزودتى بعدك بالعناد
وأنا كان كل همى
إنى أقرب وأوصلك
دلوقت هنحسبها صح
بلاش عناد حب ووداد
لأ نى صبرى إنتهى
ولا قادر تانى أحن لك
الشاعر/عزالدين جبريل