نفسي الحكومة
محمد ضباشه/يكتب............
نفسي الحكومة
-------------
نفسي الحكومة بجلالة قدرها
تنزل في يوم تفطر معانا
وتشوف بأيه ياكلوا البشر
ومين في بيتنا فاضل ما عانا
يمكن ينوبها من الفقر جانب
أو تغرق في بحور بكانا
وتبقي لقمة بالهنا والشفا
ولما ترحل ما نكون حزانا
ولو جنابها بتصحي متأخرة
علي الغدا عازمين أبوها
علي بصلة حلوة منورة
ومش زلعة ما يوم شافوها
ولقمة بايتة مقددة
ما أعرف ولادي منين جابوها
ويبلعوا بميا وسخة
من اللي جنابهم للناس باعوها
بس في ساعتها هيعرفوا
الفقرا ليه بيأهملوها
ولو جنابهم مقيلين قبل العشا
علي العشا أكل العيال
هتشوفوا ضرب ومهرسة
واللقمة طايرة بينهم ياخال
والنونو جنب أمه حزين
والدمع يسأل ليه ما طال
وأنا وأمهم متحسرين
لما تقولوا أحوالنا عال
ونبات ونصحي متنكدين
لا حد زارنا ولا حد شال
حكومة أيه دي يابلد
وعن الحقيقة مغيبين
وليه صراخنا بينجلد
وعن أمثالنا متأخرين
والمسألة للحل أسهل
ما نغنيها هنجيب منين
وخيرنا مغرق بلدنا
ومحتكرينه النشالين
الشاعر محمد ضباشه
ليست هناك تعليقات